قربان کیمی ئوز قانینه غلطان بالام وای
قرآن یولونـدا دینینـه قربـان بالام وای
لیلا آنون دل داغلیار
ســن تک جوانـــه تائولمیوب قان آغلیار
ای نـــــاز دانـــــه
عـــزم ایلـدون حیـدرکیمی کـوی جهاده
یانّـام سنــون بـو دردوه مـن فوق‌العاده
گیتدون عقاب اوسته اوغول گلدون عباده
سو ایچمیوب الده ئولن عطشان بالام وای
فانـی جهانـــه عـار اولا یکسـر یالاندی
هانسـی گناهــه جـام امیّدیـم جالاندی
صَرصَراَسوب آرزی باغیم سولدی تالاندی
گیتدی فنایه لاله و ریحان بالام وای
بـو آرزدیدیــم بــــاغ دلـدن لاله دَرّم
بیر گـون طویونـدا ای وجاهتـده مُکرّم
زیــر قــدوم نــو عروســه لالـه سَـرّم
وای بختیمـه سسلور آنون الان بالام وای
ای مرغک خوش منظر و شهپر سفیدیم
تـار تِلون تک قطع اولـوب تـار امیدیم
سس ویر سسیم باتدی ایـا زیباشهیدیم
آغلار سنه هر صاحب وجدان بالام وای
عمریم سماسیندن سوزوب گیتدون زواله
قانیلـه پرده سالموسان سولموش جماله
هیچ بیلموسن امـا ننـون قالدی نه حاله
قبره گیدینجه ایلرم افغان بالام وای
قلبیـم تلاطــم ایلیـور سینمـده قالمـور
سعـی ایلورم صبـر ایلیـم آرامـش آلمور
هی اوخشیوب هی آغلورام دردیم آزالمور
اون سگیز ایل هر دردیمه درمان بالام وای
احوالـوه گــوز یـوخ دل سوزانیم آغلور
قلبیمده قان جوشه گَلـور شریانیم آغلور
اوغلوم سنه هر جان دینـده قانیم آغلور
هی آغلیوب هی سسلرم گریان، بالام وای
آی تک غـروبی کیم سنه ئورگتدی اکبر
قانلـی عبــاده پیکـرون راحتـدی اکبر
دنیا منـه سنسیز بوگـون ظلمتدی اکبر
قانلی جمالی چون مَه تابان بالام وای
هیچ لاله سن تک ای گوزل گُل پر پر اولماز
باشون کیمی عــالَمده سینمش گوهراولماز
دنیانی گـزسون من کیمی هیچ مادر اولماز
حنجر انوبدور باشووه هاردان بالام وای
گـرچه بـو باشـون یاره‌سی رمز ظفردی
قـرآن الینــده پیکـر دینـــه سپــردی
باش یارون اما باش دئمه شق القمردی
آغلار سنـه منظومۀ کیهان بالام وای
کربلا زمزمه سی - هادی اردبیلی
