چون دشت بلا منزل اولوب میرحجازه
زینب او زمان گؤزیاشینـا وئردی اجازه
عرض ایلدی قارداش ندن اولدون بیله دلگیر
تاپــدی نیــه رنــگ شریفــون بیله تغییر
نـه باعـث اولـوب آهـون ائـدر عـالمه تأثیر
کشف ایله کونول سرینی بو محرم رازه
وجهی ندی قارداش ساری گل‌تک سارالیبسان
مـن دربــدر عشقـی غـم و درده سـالیبسان
زینـب سنـه قـربـان نیـه بـو حـاله قالیبسان
آرتار سنه باخدیقجا غم اوستن غم تازه
بـو دشـت غـم افزادی مگـر عشق مناسی
بیـر اوزگـه هـوادیر گـورورم آب و هواسی
باشدان بولورم وار باشیمون چوخلی بلاسی
جان اول منزیلده نولور گئتسه گدازه
شــاه شهــدا آچــدی لب لعل گهـربـار
فرمایش ائدوب زینبه کی خواهر غمخوار
صحـرای بلادور بـو دولانمـاز بـورا اغیـار
بیگانه‌نی قویمازلا گیره مجلس رازه
بوردا یاتاجاق قانه باجی گل کیمـی قانلار
ناحق یئره بوچولدن آخار سو کیمی قانلار
مین شوقلـه باشین وئری بوتازه جـوانلار
عریان قالی یئتمیش ایکی صدپاره جنازه
بو چولده باتار قانه گل سنبل اکبر
لیـلا اولــی دیوانـه برای دل اکبر
بـو نوعیلن آشفته اولور کاکل اکبر
عشق اهلی دوشر آرزوی دور و درازه
بـو یئـرده باتـار یاسـه باجی قـاسم آناسی
بیر گونده اولور اوغلونین آخر طوی و یاسی
دامادین اولور طوی گونی اوز قانی حناسی
حسرت قالـو بیچـاره گلین حجلۀ نازه
عباسی گـورورسن چکیلیب قـدی علم تک
هر درد و غمین بیر یانا ای باجی بو غم تک
ظلمیله دوشر قوللاری بیـر جفت قلـم تک
صدحیف او اوزون قده او بازوی درازه
وار اؤزگه مصیبت چوخ ائدر قلبـوه تاثیر
گلمــز دیلـه امـا ائــدرم رمـزیلـه تقریر
منــده دییــرم نیــزه‌ده آوازیـلـه تکبیر
باشسیز دورارام اونداکی قان ایچره نمازه
صـراف آت اوز نقـدوی کسـب زر دیـن ائت
بـول قدرینی یاز نـوحه سوزون درّ ثمین ائت
تأییـد حسین اولیمـه هـر کیمده یقین ائت
مشکلدی قلم صفحیه بیر کلمه‌نی یازه
کربلا زمزمه سی 2 – صراف
