ای سـرو چمـن قاسم
آچ قانلی گوزون یاتما آهـوی خُتـن قاسم
دلبنـد حسـن قاسم
چالما چوخ شهپرتک یورقون قولوی
خیمــه ده گـوزلیـور زینـب یولـوی
عمـرون باشا تـز چاتـدی من بی‌کسی آغلاتدی
فکریمده سنون عمرون آی سانکه چخوب باتدی
یا بیـر گلیدون عشقـون گل صـاحبینه سـاتدی
باتدی یاسا هجرونده گلزار و چمن قاسم
کیم آلدی سنی مندن قان ایچره بله سالـدی
ای آینــۀ تقـــوا کیــم داشـه سنی چالدی
بیچـاره ننــون دائـم هجرونـده ملـر قالدی
تا وار نفسی آغلار هر اوغلی ئولن قاسم
ئوپدوقجه ئورک دویمور چشمن خماروندن
قانـون سوزولور سـو تک تپراقـه عُذاروندن
آلاّم حسنون عطرین جـان اوسته کناروندن
فریاده گلوب آغلار قارداشیم حسن قاسم
آغلار گوزلین سسلـر معنـاده بـالام لای‌لای
طوفاندا باتـان قانلی دریـاده بـالام لای‌لای
آغلور باشون اوستونده زهراده بالام لای‌لای
یاس دوتماقا جنّتدن وار چوخلی گلن قاسم
دنیـای فنـا داشین باشونـدن عـجب آتـدون
قانه بویانـوب گتـدون ئـوز مقصدوه چاتدون
ظلمت گئجه‌ده آی‌تک چخدون ولی‌تز باتدون
رُخساری قزل قاندان ای پرده‌لنن قاسم
جسموندن ئوپوب مین‌یول- گه نیزه گهی‌خنجر
جسمـون ایـاق آلتنـدا - گل‌لـرتک اولـوب پرپر
احـوالــوه وار حـقّــی – گلشنــده سـولا گُللـر
یرده بورونوب جسمون قانونله کفن قاسم
بیر حـاله دوشوبسن ای پـرپـر داغیلان لاله
هر یاپراقون اوستونده قاندان دوزولوب ژاله
انصافی اولان سـالماز هیـچ لاله‌نی بـو حاله
گویا اَزیلوب یرده یاقوت یَمن قاسم
کربلا زمزمه سی - هادی اردبیلی
