دوشموشم تپراقا عطشان یتیش امداده حسین
باشیمون اوسته گلـوب حضـرت زهراده حسین
گل علمدارون ئولور- تشنه سردارون ئولور
دوره‌می مور و ملخ مثلی آلوب قوم عدو
گتـوره بیلمدیم عفو ایله منی اصغره سو
آلمیشام سو یرینه قانیله بو چولده وضو
سالمیشام تپراقا بیر قرمزی سجاده حسین
دگدی سو مشگیمه اوخ سالدی بلا بنده منی
قـزلارونـدان ایلـدی حـرملـه شرمنـده منی
سویومون اولماماقی ایتـدی سرافکنـده منی
سویولون گوزلمسون اصغر شهزاده حسین
پیکریم بـاشدان ایاقـه توخانوب اوخ یارادی
سینه‌مـی شانـه کیمی نیـزه و خنجر دارادی
بیلمورم هیچ یوزوم اوسته یخلان یر هارادی
دوشموشم واردی گمانیم لب دریاده حسین
بودی قصدیم گله‌سن بیرده ئوپم مقدمیوی
آلارام جانیمـه هـر محنتـووی هــر غمیوی
پرچمون صاحبی سن‌سن گَل آپار پرچمیوی
قالماسون پرچم قرآن دل صحراده حسین
دِ بـو قانلـی علمـی اهـل یقینـه ویره‌لر
خیمـه‌ده زیـنب فرخنـده جبینـه ویره‌لر
وطنـه گیتسلــه گــر ام‌بنینــه ویـره‌لر
بیله سالدیم دم آخر اونیدا یاده حسین
گل بـو آخـر نفسیمـده ال ایـاقوندن ئوپوم
مـه جبینـون، یانورام درد فـراقوندن ئوپوم
کسیلن وقته باشیم تشنه دوداقوندن ئوپوم
صورا آسوده ویریم باشیمی جلاّده حسین
کربلا زمزمه سی - فرهنگ خدایی
