یاتمـا ای چهـره قمـر نـور بصــر یارالی قربانیم
اخیامه حمل ائلیوم پیکریوی یوخومدی امکانیم
قدّیـم غمـدن بوکولـوب ایله منه نظاره اکبرجان
آچ زیبــا گوزلرووی باخ آتــووا دوبـاره اکبرجان
ای فقیـه آل عبــا قهــرمــان کــرب و بلا
پیکرون قانه بویانوب اولدی اِحیا دین خدا
شبیه طاهـا سن
گوزوم سنه قربان عزیـز زهرا سن
میــد لیـلاسن
سینونده اوخ یاراسی گل بزیـوب حضـور جـانانه
اصغـر گورسه دولانــار گُل باشیـوا مثـال پـروانه
منـده بیـر شمع کیمی اودلانارام سنون کنارونـده
حقّیم وار نوحه دئیوب باشه وورام یانام شرارونده
ای نگاریـم یـاتمـا بئلـه یـانـدی قلبیم چاره ائله
باشووین اوستونده ویرور گوز یاشیم دنیانی سئله
شهـیـد اول سـن
یارالی سان اوغلوم وحیـد افضـل سـن
سینمده دینجل سن
تلّیـن اوستونده بیبـون باشدا قـرا سنی دعا ایلر
گلسون اخیامه سنه غملی باجیـم جانین فدا ایلر
سنسیز وای قیزلاریمون گونلرینه جهانی داغلاللار
اولسـا سالـم قالانی سینه ووروب وطنده آغلاللار
گوزلریم قرباندی سنه ایله اوغلوم تکیه منه
منتظـر دور عمه‌لـرون یوسف گـل پیرهنه
گوزل نگاریمسن
سپـــاه قرآنـدا سولان بهاریمسن
طلایـه داریمسن
ای نخـل پـر ثمـریـم اشک تریـم آخـور فراقـوندن
فکریم وار اینجمه سون لیلی کیمی ئوپم دوداقوندن
ئوپسم گُـل لبلـرووی روحیـم آلار وصـالیـدن توشه
امکانـون اولسـا اگر آچ قولــووی منـی آل آغـوشه
ای گُل خوشبوی جنان گوزیاشیمدان یوخدی امان
چـارم اولسا جان وئررم باشوویـن اوستونده اینان
دیزیمــده یـوخ طاقت
قوی ال چالان چالسون گـوزوم باخـور حسرت
سینمـده یــات راحت
باشوندن قان توکولور گل یوزووه الیمده یوخ چاره
قاتللـر گـوز گـوزه‌دی غملـی بـابون قالوبدی آواره
بـو قانلـی بستـرووه لبلـرووه ئـوزوم فـدا اوغلوم
صد پـاره پیکـرووه گوزلـرووه گـوزوم فـدا اوغلوم
یاره‌لردن قان داغیلوب قان دئمه مرجان داغیلوب
دوغرانــوب آیـات خدا مقتلــه قــرآن داغیلوب
وفالی سان اوغلوم
بـلالــی لیلانـون یارالی سان اوغلوم
مارالی سان اوغلوم
کربلا زمزمه سی - غفاری اردبیلی
