ای حسین نوکری بوشلامـا سنگری
اگنووه گی قاره یاپوش قانلی علمدن
یاده سال تشنه لب اوخلانان اصغری
ایسته دوا دردیـوه سقّای حرمـدن
ای- الی قنداقینه باغلـی بالا لبّیک
ای- بالاسی قانینه غلطان آقا لبّیک
آنامیز ئورگدیب بیـزه پروانـه‌لیک
شمع وفایه گئجه گوندوز ویراروق پَر
بودی مستانه‌لیک بودی مردانه‌لیک
آدیـوه قربـان اولا جانیـم علی اصغر
ای- بوغـازی پارچالانان صــود امـر آهو
ای- سودان ئوتری گئجه گوندوز مَلَر آهو
شـه گلگـون قبــا گتیـروب اصغری
ویردی نشان لشکره ئوز اللری اوسته
دیدی یاخشی باخون قـوریوب لبلری
سینمون اوسته ملیور شهپری بسته
کیم- بالامـا سو ویـره جبـران ایلرم من
سو- اونا محشر گونی احسان ایلرم من
سو ویرن اولمادی او سوسوز ماهیه
دگدی سه پراوخ بالانون بیچدی بوغازین
نه روا اوچ پَراوخ دگـه شش‌مـاهیه
گورمیـه بیچاره دویونوجـاق ننـه نازین
ای- ننه سین درده سالان باب الحـوائج
ای- آدی هر یــرده اولان دیللـره رایـج
سوزولوب اوجونا علـی اصغـر قانی
یاخـدی اَوَل صـورت زیباسینه مـولا
بوغازین ئوپمَسم دیدی چیخماز جانی
حیف اولا یوخـدی گله امدادیمه سقّا
ای- قولی تندن کسیلن هاردا قالوبسان
ای- سو کنارینـده ئولن هاردا قالوبسان
بالامـون پیکـری بویانوب قانینه
قان توکولـور تپراقا پیکان یاراسیندان
آند اولا اصغرین یــارالی جانینه
فاطمـه عطـری گلور الان یاراسیندان
ای- منـی آواره قویـان تشنـه کبوتر
من- اولارام جانیوه قربان علی اصغر
کربلا زمزمه سی - غفاری اردبیلی
