یارب بالام اصغردی ویرور جان الیم اوسته
چالدی ال ایـاق بوقوزی قربان الیم اوسته
یوخ بیر نفـر اولسون منه بو عَرصَه‌ده یاور
نهر اوسته دوشوب قولسوز اباالفضل دلاور
بــو غنچــه گلی تیـــر جفــا ایلدی پرپر
نازک بوغازیندان سوزولور قان الیم اوسته
لای لای دیدیلـر بلکـه بشکده یاتا اصغر
سو فکرینی بیر لحظه باشیندان آتا اصغر
لبیـک دیـدی قانه بـو چولـده باتا اصغر
اوخ ایتدی بوگون دردینه درمان الیم اوسته
تفکیک اولا تـا عشـق حقیقیلـه مجازی
عشق ایستدی میدانینه بو غنچه‌ی نازی
ظلمین اوخونا اولـدی سپر تشنه بوغازی
گل جسمی اولوب قانیله الوان الیم اوسته
عاشق‌لـر ایچینـده هامیدان سینیده آزدی
آلتی آیی وار گُل هله یوخ غنچــه‌ی نازدی
آق دوشلوگونون اوسته آخان قانیله یازدی
پاینـده گرکـدور قـالا قـرآن الیم اوسته
چون عشق مناسینده ره حقه فدادی
گلگون یـوزی آئینــه توحیـد نمادی
بو تشنه بالام نقطۀ عَطف شُهـدادی
حق اوسته اولوب قانینه غلطان الیم اوسته
اوچ پر اوخونان صـود امرین نسبتی اولماز
هیـچ صـود امریـن بو ستمه طاقتی اولماز
دنیـا هامـی اصغـر قانینـون قیمتی اولماز
وار بوندا گوزل منصب شایان الیم اوسته
واجبــــدی اطاعــت اولا حکــم ازلیدی
گهـواره ده ال آچماسـی عکس العملیدی
اوخ دگـدی ولی اوخ دیمدی آدی علیدی
باخـدی یوزیمه لبلـری خندان الیم اوسته
یارب سنه خاطر هامی انصاریمی ویردیم
دریـای ادب قولسوز علمداریمـی ویردیم
یتمیش گُلی بیر غنچـه گلزاریمی ویردیم
پـرواز ایلدی قوش کیمی الان الیم اوسته
کربلا زمزمه سی - مغانلو
