سالسالار سو صحبتین عبّاسه آغلار گوزلریم
یـاد ایـدر شخصیّتین عبّاسه آغلار گوزلریم
کربـلا دشتینده سالدی غُلغله سو صحبتی
خیمه‌گاهه باغلاناندا سو چوخالدی قیمتی
اُلدوره سـوز عطش آز قالدی آل عـصمتی
یاد ایدور اول ساعتین عباسه آغلار گوزلریم
ساقی لب تشنه‌گان باخدی سارالمش گللره
بوش قالوبدی مشگلر گلدی گران سرلشگره
آدی سقّادی، ولـی تاپمور سو دلسیز اصغره
قیل تصوّر غیرتین عباسه آغلار گوزلریم
بعضیسی ایلور سوسوزدان خیمه‌لر سمتنده غشّ
بعضیسی سسلـور منی یاندیردی بو سوز عطش
چـاره تـاپمـور قــزلارا آغلـور ولی اول مـاه وش
درک ایدنده رقّتین عباسه آغلار گوزلریم
ایوای عباسین آدی سقّـادی سقّاده سو یـوخ
بو سِمَت کرب و بلا سـردارینی آغلاتدی چوخ
العطش صوتی اونون قلبین دلوبدور مثل اوخ
آلدی صبر و طاقتین عباسه آغلار گـوزلریم
کیـم گـورور عبّـاسی تـزتـز لبلرینـده سـو دیور
آز قالور اُولسون سوسوزدان بیر سوری آهو دیور
قزلارین آخمش گوزی اولـدوزکیمی سوسو دیور
غم ساراتمش صورتین عباسه آغلار گوزلریم
کربلا زمزمه سی - عینی‌فرد زنجانی
