اولموشام مدّتدی قبروندن حسین دور آغلارام
اؤلـسم گـلّـم اورکــده وار بـو منظـور آغلارام
هر کس اولدی دهرده بیـر مه‌لقانون عاشقی
منده اولدوم بیر حسین بیر کربلانون عاشقی
رسمدور عاشق اولار نـی تـک نوانون عاشقی
اولموشام سر پنجۀ عشقونده مقهور آغلارام
غصّـه‌دن قانیله دولموش گـؤگلومون پیمانه‌سی
اولموشام عشقونده من بیر نحویله غم خانه‌سی
آدیمی سسـلـر حسینیلـر حسیـن دیــوانه‌سی
ایلیوب عشقون منی دیوانه مشهور آغلارام
من گدا سن بیرجه شاهنشاه گردون بارگاه
گیزلین عشقیم وارسنه آگـه‌سن ای سرّالاه
گر گدا شاهه اولا عاشـق دگـول شاها گناه
عشق جرم اولسا وارام جرمومده معذور آغلارام
من گنهکـاری آقـا درک ایتممیش پیک اجل
گوشۀ چشمیله بیـر لطـف ایله ای صبح ازل
یا منی اِیسته گلیم یا جان‌ویرن وقتیمده گل
گورسون عزرائیل الیمده واردی منشور آغلارام
گر منـی ایتسـه مَخَیّـر کـردگار ذوالمنن
کربلانی ایستوسن یا روضۀ رضوانی سن
ایسترم کربوبلانـی نیلـورم فردوسی من
قبروه قـالام مجاور تـا دم صور آغلارام
ایلـورم بیـر عمـر دور شش‌گـوشـه قبـرون آرزو
طوف ایدم قبرون قیلام اشگیله گردین شستشو
محشـره بـو خـدمتیلـه اَخـذ ایـدم بیــر آبـرو
اولماسام بو خدمته ای‌شاه مأمور آغلارام
بیرده گورسیدیم اگـر بالای سـرده دورموشام
کاسۀ چشمی سرشگ چشمیله دولدورموشام
اکبـره پـائیـن پــا ده بـزم مـاتـم قورموشام
فاش ایدوب قویمام قالا بوعشق مستور آغلارام
رحـم ایلــه بـو بـی‌پنـاهیـن دیـدۀ گـریانینه
قویما ممزوج اولسون اشگ حسرتی دل قانینه
گؤگلوم ایستور قبرووی آند اُولسون اکبرجانینه
یئتمسم وصله گوزومده واردی تا نور آغلارام
نیلیــوم یتمـور الیـم ای شهـریــار مستظام
بوینی چگننده دوروب ویرّم اوزاقدان بیرسلام
السّلام ای جـان‌ویرن کـرب و بلاده تشنه‌کام
ایلـرم قبـرون مجسم زار و رنجور آغلارام
السّلام ای حق یولوندا جاه و عزّتدن گیچن
السّلام ای سو یرینه لخته لخته قـان ایچن
السّلام ای اوز الیلـه اوغلـونـا خلعت بیچن
وصل اکبردن ایدن لیلانی مهجور آغلارام
السّـلام ای سـو ویـرن قـانی بلا صحـراسینه
السّـلام ای آدی زینـت هــر بــلا طغـراسنیه
السّلام ای غرق اولان کشتیسی قان دریاسینه
سالدی ساحلدن مخالفلر سنی دور آغلارام
السّلام ای ذات پـاک کـردگـارین مظهری
السّلام ای لفـظ ثـاراللهین عـالی مصدری
السّلام ای «وِتر مَوتورون» مترجم مضمری
قان ایدوب گوزیاشیمی بیر «وِتر مَوتور» آغلارام
السّلام ای سو کنارینده لب عطشان جـان‌ویـرن
السّلام ای قوملار اوسته جسمی بی‌غسل و کفن
السّلام ای نیزه‌ده گـون تک باشی شـامه گیدن
یاد ایدوب احوالووی ای نَحْری منحور آغلارام
السّلام ای مَصْرعی قـانیله دریا تک دولان
السّلام ای غسلی قانی توپراقی کافور اولان
السّلام ای نعشی اوسته زینبی زلفون یولان
زینب آدی آرتورور باشیمده مین شور آغلارام
مُلتجی دور بو «حسینی» یـا حسین آگاهسن
بیـر گدای رو سیـه دورسن سَخـی بیرشاهسن
ای «قَتیل العَبْره» اشگ چشمه خاطرخواهسن
ایستورم سنلن اولام محشرده محشور آغلارام
کربلا زمزمه سی 2 - حسینی (سعدی زمان)
